23/05/2018

Na Feira de Asociacións de Ámbito Social de Lugo

Nas imaxes veredes o posto da nosa Asociación na II Feira das Asociacións de ámbito Social de Lugo o pasado día 12. A pesar da choiva, bastante xente se achegou a coñecer as actividades da nosa Asociación, actividades que podedes ver picando aquí. Houbo tamén espazos lúdicos e educativos para os máis pequenos, que tamén poideron gozar dos contos de Anxo Moure.


08/05/2018

A Asociación Socioeducativa Antonio Gandoy na II Feira de Asociacións de Ámbito Social de Lugo

O venres día 11 de maio estaremos na Praza de San Marcos de Lugo, na II Feira de Asociacións de Ámbito Social de Lugo, mostrando as actividades que levamos a cabo e desenvolvendo espazos lúdicos e educativos para todos os nenos e nenas que xunto as súas familias se acheguen ata alí. 

Estarán connosco outras asociacións da cidade como Adega (ecoloxismo), Aliad Ultreia (varios), Ameis (inmigración), Aviva (varios), Axunica (cooperación), Dez Portas (varios), Inmigrantes y Retornados Rioplatenses (inmigración), Leda (Defensa animais), Penitenciaria Concepción Arenal (varios), Reiki Lugo (saúde), Taller de Solidaridad (cooperación) e Venelu (inmigración). 

A Feira está organizada pola Federación de Asociacións do Ámbito Social de Lugo, que pretende establecer vínculos entre as distintas asociacións do ámbito social de Lugo para fomentar a colaboración e o traballo en rede, servir como interlocutora entre os membros e os distintos organismos públicos e/ou privados e axudar na integración social dos diferentes colectivos tratados polas entidades participantes (entidades que se moven nos ámbitos de familia, muller, infancia, persoas en vulnerabilidade, saúde, emprego, comercio xusto, cooperación ao desenvolvemento, cultura, deporte, voluntariado e sensibilización, entre outros).

Esperámosvos.


19/03/2018

O Son que me Arroupa da Asociación Socioeducativa Antonio Gandoy, en Baleira

No CEIP Concepción López Rey de Baleira estivemos o día 9 de marzo coa actividade "O Son que me Arroupa", actividade pensada para poñer en valor o traxe e a música tradicional. Ademais disto, esta proposta educativa inclúe dramatización, sombras chinescas e experimentación e manipulación dos tecidos empregados para facer os traxes tradicionais, coas súas diversas texturas, nun espectáculo sensorial que fai as delicias dos máis pequenos da casa.
Damos as grazas a Doris e Azu polo seu entusiasmo e bo facer, e a Pilar polo éxito de organización e participación.




08/03/2018

8 de Marzo, Día Internacional da Muller

No día de hoxe, 8 de Marzo, Día Internacional da Muller, o movemento feminista, co apoio de organizacións e colectivos políticos, sindicais e sociais, convoca unha folga xeral e diversos paros parciais das mulleres, de alcance internacional. Unha folga que pretende poñer o foco de atención nos diferentes espazos nos que se produce a desigualdade: laboral, educativo, de coidados e de consumo. Neses catro ámbitos estamos convocadas a facer folga as mulleres. 

Unha convocatoria de denuncia fronte ás desigualdades, ás discriminacións e ás violencias estruturais que sufrimos máis da metade da poboación mundial, as mulleres. Unha convocatoria para a reivindicación dun novo modelo social, xusto, democrático e igualitario, no que a educación está chamada a ofrecer alternativas concretas, alén da retórica habitual que rodea estes días singulares no calendario. 

Asociación socioeducativa Antonio Gandoy fai público o seu apoio a esta convocatoria, secundando a folga e acudindo ás mobilizacións. Facemos un chamamento á participación de todas as mulleres nas diferentes iniciativas reivindicativas. 

Un dos principios fundamentais da Asociación é "promover unha educación que capacite á persoa a comprender a realidade, intervir nela e vivir en harmonía consigo mesmo, cos demais e coa natureza" e neste principio é no que encaixa a defensa activa da igualdade de dereitos entre todos os seres humanos, sen distinción de sexo, raza, ou ideoloxía.

Promovemos distintas reflexións sobre a necesaria revisión da tarefa educativa familiar en relación cos tempos sociais, axudando a superar  etiquetas sexistas e difundindo experiencias innovadoras neste ámbito, coa intención de contribuírmos á reflexión e formación colectiva.

Hai aínda, moito camiño por andar para acadar a tan desexada igualdade entre mulleres e homes, e está nas nosas máns  e no seo das familias poñer os primeiros chanzos para seguir avanzando.

Por estes motivos, NÓS IMOS Á FOLGA.

14/02/2018

A Asociación Socioeducativa Antonio Gandoy en El Progreso

Compartimos un enlace dunha nova publicada no diario El Progreso sobre o traballo realizado pola Asociación Socioeducativa Antonio Gandoy. Agradecemos esta reportaxe




09/02/2018

Compartindo nos Espazos das Familias da Asociación Socioeducativa Antonio Gandoy

Nestes días pasados, xuntáronse no CSC de Nemenzo (Santiago de Compostela) as familias que participan nos Espazos das Familias que se celebran semanalmente nese Centro e máis as de O Sar, nunha xornada de confraternización na que gozaron do Antroido, merendaron, cantaron, contaron contos e compartiron experiencias.

Unha tarde para compartir, coñecerse e crear lazos. Foi tan enriquecedora a experiencia que se repetirá, esta vez en Sar. 

Foi moito o tempo dedicado a intercambiar vivencias e problemas na crianza, e foi xenial comprobar que non somos tan diferentes, e que compartimos moitos agobios, preocupacións e, sobre todo, alegrías. 

Lembramos que o concello de Santiago ofrece, ademais deste Espazos, outro Espazo das Familias no CSC de Santa María, Espazos onde se pretende axudar a afrontar da mellor das maneiras o feito tan eriquecedor de ser nai ou pai.


25/01/2018

Facendo pan no Espazo das Familias da Asociación Antonio Gandoy de Quiroga e Ribas de Sil

As familias participantes no Espazo das Familias de Quiroga de Ribas de Sil estiveron a facer pan.

Trátase dunha actividade na que unha morea de procesos e de sentidos puxéronse en marcha: coordinación ollo-man, experimentación con texturas diferente, olfacto, ben rico, por certo, o coñecemento dos alimentos, a importancia da hixiene, ..., e, por suposto, o gusto: todos os presentes gustaron do pan recén feito.